टाटा नेक्सॉन ईव्ही - सुरुवात

२५ ऑक्टोबर २०१७. आमच्या ज्ञानेश्वरीचा पहिला वाढदिवस. आणि त्याच दिवशी पहिल्यांदा आम्ही आमची पहिली चारचाकी गाडी घरी आणली. मारुती वॅगनार. किंमत पाच लाखापेक्षा अधिक होती. परंतु त्याकाळी गाडी घेण्याची गरज होती म्हणून कसे व्हायचे पैसे जमा करून आणि कर्ज काढून गाडी विकत घेतली. गाडी घेतली त्यावेळेस मला ती चालवता देखील येत नव्हती. परंतु नंतर हळूहळू चालवायला लागलो. आणि मग गाडीनेच बऱ्याच ठिकाणी फिरायला लागलो. कालांतराने उत्पन्न वाढले, गाडीचे कर्ज देखील मिटवले आणि गाडीवर बऱ्यापैकी हात बसलेला होता. आज सात वर्षांनी आम्ही ठरवले की आता नवीन गाडी घ्यायची. सुरक्षितता हा आमचा प्राधान्य क्रम होता. म्हणून टाटाचीच गाडी घ्यायची असे ठरवले होते. रश्मीला टाटाची नेक्सन आवडली होती. माझा देखील काही वेगळ मत नव्हतं. त्यामुळे यावर्षी गाडी घ्यायचीच म्हणून आम्ही पक्कं ठरवलं.
मागच्या दोन वर्षापासून टाटा मोटर्सने त्यांच्या पंच, टीगोर, अल्ट्रोज सारख्या गाड्या सीएनजीमध्ये आणल्या होत्या. आणि ते लवकरच नेक्सॉनसुद्धा सीएनजीमध्ये आणणार होते. आम्ही बऱ्याच ठिकाणी चौकशी केली होती. त्यानुसार टाटा नेक्सॉन सीएनजी लवकरच येईल, असे आम्हाला वाटले होते. आणि त्यासाठीच आम्ही बरेच महिने थांबून होतो. ज्ञानेश्वरीच्या यंदाच्या वाढदिवसाला गाडी घ्यायची होती. दोन महिने बाकी होते तरी देखील नेक्सॉन सीएनजी अजूनही लॉन्च होईल की नाही याची कोणालाच माहिती नव्हती. त्या दृष्टीने चौकशी करण्यासाठी आम्ही टाटा मोटर्स पिंपरी मधील शोरूमला जायचे ठरवले.
शोरूम ला गेल्यानंतर समजले की अजून नेक्सॉन गाडी सीएनजीमध्ये यायला बराच काळ अवकाश आहे. किमान सहा महिने तरी आधी एखादी गाडी येते तेव्हा शोरूमला माहित होत असते. म्हणजे अजून सहा महिने तरी आम्हाला गाडी मिळणार नाही, असे समजले. त्यातच त्यांनी इलेक्ट्रिक कारचा पर्याय सुचवला. शोरूममधील कस्टमर केअर एक्झिक्युटीव्हने आम्हाला कार दाखवली देखील. तिची विविध वैशिष्ट्ये देखील सांगितली. शिवाय काही महिन्यांपूर्वीच या कारची किंमत जवळपास साडेतीन ते चार लाखांनी कमी झालेली होती.पहिल्यांदा पाहिल्यानंतर आम्हाला एकंदरीत गाडी आवडली. विशेष म्हणजे गाडी ऑटोमॅटिक होती. आरामदायक होती. त्यामुळे पहिल्याच वेळेस ही गाडी आम्हाला भावली. घरी आल्यावर आमचे इलेक्ट्रिक कारबद्दल संशोधन सुरू झाले. काय तोटे, काय फायदे? याचाही विचार विनिमय झाला. महाराष्ट्रामध्ये कुठे कुठे इलेक्ट्रिक चार्जिंग स्टेशन्स आहेत, याचे देखील आम्ही सर्वेक्षण केले. एकंदरीत इंधनावर किती खर्च येईल? याचाही अंदाज आला. भविष्यामध्ये आता केवळ इलेक्ट्रिक कार चालतील, हे आम्हाला माहीत होते. शिवाय ही गाडी १००% पर्यावरणपूरक अशी आहे. अर्थात त्याच्यामुळे पर्यावरणाला कोणत्याही प्रकारचा धोका नाही. या सर्व बाबी लक्षात घेता आम्ही टाटा नेक्सॉन इलेक्ट्रिक घेण्याचे ठरवले.
प्रश्न होता कोणत्या शोरूम मधून घ्यायची? गावी गेल्यावर अगदी नारायणगाव आणि मंचर मधील टाटा शोरूममध्ये देखील चौकशी केली. परंतु तिथे कार पाहण्याकरता उपलब्ध नव्हत्या. मग पिंपरी, काळेवाडी, चाकण अशा विविध शोरूम मधून कोटेशन्स मागवले. रश्मीच्या चाकणच्या दाजींची विविध शोरूममध्ये ओळख होती. त्यांच्याच ओळखीने भोसरीच्या टाटा शोरूम मधून आम्हाला सर्वात कमी किंमत मिळाली. आणि अखेरीस येथूनच गाडी घेण्याचे ठरले.